Líf á eldfjallaeyju: Fjölskyldudagskrá í Öskju á morgun

Háskóli Íslands verður á morgun með dagskrá fyrir alla fjölskylduna í máli og myndum um jarðfræði og líffræðilega fjölbreytni Íslands í Öskju, náttúrufræðihúsi Háskóla Íslands.

Í tilkynningu frá skólanum segir að Ísland sé draumaland jarðvísindamannsinns með Atlantshafshrygginn og heitan reit undir landinu sem valda mikilli gosvirkni sem skapar nýtt land og umbylta því gamla. „Gosið í Eyjafjallajökli eru nýjasta birtingarmynd um mátt náttúruaflanna. Líffræði landsins á fáar hliðstæður. Þrátt fyrir að eyjan hafi verið þakin jökli fyrir 12000 árum, er samt mikil fjölbreytni í lífríkinu."

„Fjölbreytileiki náttúrunnar er auðlind, sem sjá má meðal annars í nytjastofnum og lífríki hafsins. Jarðfræði og líffræði Íslands tvinnast stöðugt saman; Hlaup undan jöklum búa til stóra sanda, vistkerfi lands og hafs verða fyrir áhrifum af eldgosum, og í hraunjöðrum finnast ævafornar lífverur sem lifðu ísöldina af," segir ennfremur en þetta og fjölmargt meira verður til kynnt og skoðað nánar í opinni dagskrá í Öskju, náttúrufræðihúsi Háskóla Íslands, laugardaginn 24. apríl.

Sem fáein dæmi má nefna umfjöllun Björns Oddssonar um eldgos undir jökli og erindi Guðrúnar Marteinsdóttur um nytjastofna, þar sem hún veltir fyrir sér hvort hamfaraflóð eftir eldgos geti haft áhrif á klak og þar með viðgang þorsksstofnsins sem hrygni sunnan undir landinu. Einnig má nefna að Sigurður S. Snorrason mun fjalla um bleikjuna í Þingvallavatni. Þetta eru aðeins fáein dæmi um erindin á dagskrá að því er segir ennfremur.

„Líf á eldfjallaeyju" er dagskrá í tilefni af Degi umhverfisins og Degi jarðar, sem Sameinuðu þjóðarinnar hafa sérstaklega tileinkað líffræðilegri fjölbreytni árið 2010. Dagskráin í Öskju stendur frá klukkan 11 til 15 og er ætluð öllum aldurshópum. Aðgangur er ókeypis og allir hjartanlega velkomnir.