Færeyingar heiðra Vigdísi

Ræðismaður Færeyja afhenti Vigdísi Finnbogadóttur heiðursgjöf frá Færeyingum á áttatíu ára afmæli forsetans fyrrverandi. Gjöfin, loforð um nítján milljónir króna á núverandi gengi, 825.000 danskar, eiga að renna til Stofnunar Vigdísar Finnbogadóttur í erlendum tungumálum.

„Við Færeyingar viljum heiðra hana og hennar starf, sem hefur verið afar mikilvægt fyrir Norðurlöndin öll, segir ræðismaðurinn, Gunvør Balle. Í Færeyjum séu „allir mjög hrifnir af Vigdísi og okkur þykir virkilega vænt um hana“.

Auk færeysku landsstjórnarinnar tóku fimm færeysk fyrirtæki þátt í gjöfinni: Føroya banki, Tryggingarfelagið Føroyar, Atlantic Airways, Smyril Line og Framherji. Gunvør afhenti gjöfina í Háskólabíói í lok hátíðardagskrár sem haldin var Vigdísi til heiðurs.- kóþ