Ökumanninum sleppt - fullur iðrunar og eftirsjár

Yfirheyrslum yfir ökumanninum, sem lögreglan og Landhelgisgæslan mældu í gær á yfir 200 kílómetra hraða, er lokið. Honum hefur verið sleppt og er bifhjólið í geymslu lögreglunnar. Maðurinn er á þrítugsaldri. Hann var í haldi lögreglu í nótt en búist er við því að hann verði ákærður fyrir að stofna lífum í hættu.

Aðalsteinn Aðalsteinsson hjá rannsóknardeild lögreglunnar segir að yfirheyrslum sé nú lokið og verður málið sent til Sýslumannsins á Selfossi. Skýrslur lögreglumanna á vettvangi og skýrslur úr yfirheyrslunni verða sendar til ákæruvaldsins.

Hann segir að maðurinn hafi verið fullur iðrunar og eftirsjár. Hann hefur verið sviptur ökuréttindum til bráðabirgða, en það eru þrír mánuðir.

Sýslumaðurinn á Selfossi tekur nú við málinu og sér um að gefa út ákærur í málinu.