Oftast innkölluð vegna eiturs

Hættuleg leikföng eru enn á markaði víðs vegar í Evrópu þrátt fyrir ítrekaðar viðvaranir og tilkynningar heilbrigðis­yfirvalda. Neytendastofa sendi frá sér tilkynningu á heimasíðu sinni í gær þar sem varað er við barnaleikföngum sem hafa verið innkölluð í Evrópu. Ekki er vitað til þess að vörurnar séu á markaði hér á landi.

Algengasta ástæðan fyrir innköllun er sú að leikföngin innihalda á einn eða annan hátt eiturefni sem eru hættuleg heilsu barna. „Þetta er hluti af markaðseftirliti Evrópu og er í gangi allt árið um kring,“ segir Sesselja Th. Ólafsdóttir hjá Neytendastofu. „Tilkynningarnar eru mun fleiri heldur en við segjum frá hér á landi.“

Sesselja segir að tilkynnt hafi verið um hættuleg leikföng hér á landi . „Við höfum tekið vissar tegundir af perlum af markaði og einnig leikföngum með áföstum seglum,“ segir hún. Hún segir brýnt að fólk hér á landi sé vakandi fyrir því að barnaleikföngin séu örugg, hvort sem þau eru keypt hér á landi eða erlendis. Ef grunur leikur á að varan sé á einn eða annan hátt skaðleg börnum skal tilkynna það Neytendastofu. - sv