Roklandið rís úr sæ

Fyrir tveimur birtist stikla úr kvikmyndinni Rokland eftir Martein Þórsson. Og nú, rúmum tveimur árum síðar, er komin ný stikla úr sömu mynd með nýjum áherslum.

Rokland, kvikmynd eftir Martein Þórsson byggð á samnefndri sögu Hallgríms Helgasonar, verður frumsýnd þann 14. janúar. Myndin skartar Ólafi Darra í hlutverki hins kjaftfora Bödda en hann er dyggilega studdur af Elmu Lísu Gunnarsdóttur, Láru Jóhönnu Jónsdóttur og Ladda. Þá bregður Kastljósstjörnunni Helga Seljan fyrir í myndinni. Hann var í töluvert stóru hlutverki í gömlu stiklunni en það hefur verið minnkað og því breytt.Myndarinnar hefur verið beðið með töluverðri eftirvæntingu í talsverðan tíma en leikstjórinn segir þetta hafa sínar eðlilegu skýringar.

„Við vorum bara að vanda okkur, klippiferlið var langt og eftirvinnsluferlið tók langan tíma," útskýrir Marteinn en formlegum tökum lauk í september á síðasta ári. „Það er talsvert af brelluskotum í myndinni og hún er aðeins flóknari heldur en hún lítur út fyrir að vera. Og þegar maður er ekki með stórt „budget" þá tekur þetta allt sinn tíma," en þegar Fréttablaðið náði tali af honum var hann að vinna í hljóðinu. Margir hrifust af teiknimynda-fídusum sem sáust í fyrstu stiklunni en þeir eru ekki jafn áberandi í þeirri nýju. Marteinn róar aðdáendur þeirrar tækni og tekur skýrt fram að þeir verði fyrir hendi í myndinni.

Bókin kom út fyrir fimm árum, þegar engin kreppa var fyrir hendi, bankarnir bara í bullandi stuði og allir með yfirdrátt og gengislán. Og þegar fyrsta stiklan var frumsýnd fyrir rúmum tveimur árum virtist ekkert benda til þess að þessi gósentíð yrði brátt að baki. En svo hrundi allt. „Myndin gerist árið 2009, þetta er samt alveg sama myndin, í bara aðeins öðruvísi útfærslu," segir Marteinn sem sýndi klukkutíma brot úr henni á íslenskri menningarhátíð í Póllandi fyrir skömmu. Úti í salnum sat sjálfur rithöfundurinn, Hallgrímur Helgason. Marteinn segir að hann hafi verið í reglulegum samskiptum við höfundinn, sent honum handritið og svo hafi þeir ekki alveg verið sammála um hver ætti að leika aðalhlutverkið. „Það var annar leikari sem kom til greina sem hafði útlit Bödda. Og Hallgrímur vildi fá hann. Hann viðurkenndi hins vegar úti í Póllandi, eftir að hafa séð brotið, að ég hafði haft rétt fyrir mér, þessi karakter kemur svo mikið innan frá."

Hallgrímur sjálfur kveðst vera ákaflega spenntur fyrir frumsýningunni. „Þetta var mikil upplifun fyrir mig að sjá þetta brot og mér fannst Ólafur Darri skemmtilegur í þessu hlutverki, hann gefur þessa nýja og aðra vídd. Vandræðin við Ólaf eru náttúrlega þau að Böddi, persónan sem hann leikur, er svo ósympatískur en ég held að það hafi náðst að mynda þetta jafnvægi," segir Hallgrímur. Og hann er hrifinn af staðfæringunni, að láta myndina gerast 2009, þegar allir eru eiginlega eins og Böddi í stað 2005 þegar Böddi stakk í stúf. „Ég held að Böddi hafi verið svolítið á undan sínum samtíma með sína innri reiði, tímarnir hafa breyst í þá átt sem hann talaði um."

freyrgigja@frettabladid.is