Misskilningur á úrslitakvöldi

Rokksveitin Endless Dark bar sigur úr býtum í hljómsveitakeppninni Global Battle of the Bands sem var haldin um síðustu helgi. Hljómsveitin verður fulltrúi Íslands í lokakeppninni sem verður haldin í London 27. apríl.

Daníel Hrafn Sigurðsson, trommari sveitarinnar, segist ekki hafa búist við sigrinum, sérstaklega ekki eftir óvænta uppákomu á úrslitakvöldinu þegar sveitin spilaði þrjú lög í stað tveggja. „Það var misskilningur því við tókum þátt 2007 og fengum þá að taka tvö lög fyrst og þrjú í lokin. Við fengum síðan engan póst um fyrirkomulagið og héldum að það sama væri í gangi þarna,“ segir Daníel Hrafn, sem bjóst við því að sveitin yrði dæmd úr leik.

„Við héldum að þetta væri búið en síðan töluðum við við þá sem stjórnuðu og þá var allt í góðu. Þá hélt maður í vonina.“

Endless Dark spilar svokallaða post-harðkjarnatónlist eða „screamo“ og meðal áhrifavalda hennar eru sveitir á borð við Under­oath, Sleeping With Sirens og hin íslenska Shogun. Hljómsveitin er skipuð sex strákum á aldrinum 18 til 22 ára frá Ólafsvík og Grundarfirði og hefur starfað í núverandi mynd frá árinu 2008.

Tónleikarnir í London verða þeir fyrstu hjá Endless Dark erlendis og er tilhlökkunin að sjálfsögðu mikil hjá þeim félögum. „Við getum ekki beðið,“ segir Daníel Hrafn en alls taka hljómsveitir frá yfir þrjátíu löndum þátt í lokakvöldinu. Sigurlaunin eru tíu þúsund dollarar, tíu daga tónleikaferð um Bretland og vikudvöl í hljóðveri í London. Daníel telur Endless Dark eiga alveg jafnmikla möguleika og hinar sveitirnar sem keppa. „Við hittum fimm Breta á úrslitakvöldinu sem sögðu að þeir ættu að taka vel í svona tónlist. Þannig að ég er vongóður.“- fb