Yfir hundrað börn á biðlista

Rúmlega 120 börn eldri en átján mánaða bíða eftir leikskólaplássi í Reykjavík, samkvæmt upplýsingum frá leikskólasviði. Ragnhildur Erla Bjarnadóttir, sviðsstjóri leikskólasviðs, segir stöðuna ekki hafa verið betri í þau fimmtán ár sem hún hefur komið að þessum málum.

„Hver einasti leikskóli borgar­innar er fullmannaður og fullvistaður,“ segir hún. Ekki sé óeðlilegt að börn séu á biðlista í janúar, því leikskólar innriti flest börn að sumri.

„Í ágúst stóð ekki til að taka inn tólf eða þrettán mánaða börn á leikskólana. Þau eru núna orðin átján mánaða og bíða,“ segir hún. Um leið og pláss losni, sé barn sett inn í staðinn.

Spurð hvort ekki ætti að opna fleiri leikskóla, fyrir þessi 120 börn, segir Ragnhildur: „Jú, við erum einmitt að opna nýjan leikskóla í Úlfarsárdal. Þar ætti hæglega að vera hægt að hýsa fimmtíu börn.“

Askja í Öskjuhlíð er nýtilkominn leikskóli, en þar á bæ er pláss fyrir fleiri börn. Spurð hvers vegna borgin sendi ekki fleiri börn þangað, segir Ragnhildur: „Það var gert samkomulag um fimmtíu börn á Öskju fyrir þetta ár og við erum að borga með þeim. Hvort hægt er að fjölga þeim get ég ekki sagt á þessari stundu.“ - kóþ