Töldu innrásina lögbrot

Peter Goldsmith, sem var helsti lögfræðiráðgjafi bresku ríkisstjórnarinnar þegar tekin var ákvörðun um að ráðast á Írak, segist hafa skipt um skoðun á síðustu metrunum.

Lengst af hafi hann talið árás á Írak vera brot á alþjóðalögum, nema ný ályktun kæmi frá öryggisráði Sameinuðu þjóðanna sem gæfi ótvíræða heimild til innrásar.

„Síðan tók ég á endanum, þegar ég þurfti að komast að ákveðinni niðurstöðu, annan pól í hæðina," sagði Goldsmith í yfirheyrslu hjá breskri rannsóknarnefnd, sem er að kanna tildrög Írakstríðsins. Hann gaf þó enga skýringu á því hvers vegna hann hafi skipt um skoðun. Gagnrýnendur segja hann hafa tekið þessa ákvörðun undir pólitískum þrýstingi.

Michael Wood, sem á þessum tíma var yfirmaður lögfræðideildar breska utanríkisráðuneytisins, segist hins vegar telja að innrásin hafi tvímælalaust verið brot gegn alþjóðalögum, einfaldlega vegna þess að öryggisráð Sameinuðu þjóðanna hafði ekki gefið heimild til innrásar.

„Að mínu mati hafði öryggisráð Sameinuðu þjóðanna ekki gefið heimild til valdbeitingar, og engar aðrar forsendur voru fyrir hendi í alþjóðalögum," sagði Wood við yfirheyrslur hjá breskri rannsóknarnefnd, sem er að kanna tildrög Írakstríðsins.

Hann segir að Jack Straw, þáverandi utanríkisráðherra, hafi ákveðið að taka ekkert mark á þessu. „Hann tók þann pól í hæðina að ég væri afar kreddufullur og alþjóðalög væru býsna óljós og að hann væri ekki vanur því að fólk tæki svona ákveðna afstöðu," sagði Wood.

Elizabeth Wilmshurst, sem var aðstoðarmaður Woods, sagði af sér á sínum tíma í mótmælaskyni við ákvörðun breskra stjórnvalda um að hefja innrásina.

Hún sagði við yfirheyrslur hjá rannsóknarnefndinni að hver einasti lögfræðiráðgjafi í utanríkisráðuneytinu hafi verið þessarar skoðunar, að innrásin hafi verið ólögleg.

Tony Blair á að mæta hjá rannsóknarnefndinni á morgun.

Reiknað er með því að nefndin skili niðurstöðum seint á næsta ári. Hún hefur það hlutverk að komast að því hvernig ákvörðunin um innrás var tekin, en hefur þó ekki heimild til að sakfella neinn.gudsteinn@frettabladid.is