Borðar allt sem hana langar í á sunnudögum

Söngkonan Beyoncé Knowles, 28 ára, leyfir sér að borða allt sem hana langar í en aðeins á sunnudögum.

Beyoncé er á ströngum matarkúr til að halda í mjúkar línurnar og gott formið. Hún leyfir sér þó að njóta og það gerir hún á sunnudögum. Þá borðar hún það sem henni þykir gott án þess að velta sér upp úr innihaldinu og hvort hún bæti á sig kílóum í kjölfarið.

„Ég þarf að passa vel hvað ég læt ofan í mig en ég er ekki að reyna að losa mig við líkamslagið mitt. Ég borða til að mynda aldrei pasta. Ég á það til að borða mikið yfir helgar en á sunnudögum borða ég alltaf nákvæmlega það sem mig langar í," sagði Beyoncé.

„Að vera á sviði er líkamsrækt út af fyrir sig og þegar ég er ekki á tónleikaferðalagi þá mæti ég í líkamsræktina og lyfti lóðum, geri magaæfingar og þess háttar."