Mjólkurfrumvarp hindrar nýsköpun

Viðskiptaráð hefur sent frá sér álit á frumvarpi sjávarútvegs- og landbúnaðarráðherra til búvörulaga. Viðskiptaráð gagnrýnir frumvarpið og hvetur til þess að það nái ekki fram að ganga.

„Við tökum undir þá gagnrýni sem komið hefur fram út frá samkeppnissjónarmiðum. Við teljum þetta vera afturför fyrir landbúnaðinn og að þarna sé verið að loka fyrir samkeppni á mjólkurmarkaði,“ segir Þórdís Bjarnadóttir, lögfræðingur hjá Viðskiptaráði.

Viðskiptaráð gerir tvær athugasemdir við frumvarpið. Ráðið gagnrýnir sektarákvæði sem frumvarpið gerir ráð fyrir og heimild sem gefin er handa mjólkurbændum til að nýta allt að 10.000 lítra utan greiðslumarks eða kvóta til eigin framleiðslu.

Viðskiptaráð segir sektarákvæðið vinna gegn tilgangi laganna sem sé að stuðla að framförum og aukinni hagkvæmni í búvöruframleiðslu og vinnslu og sölu á búvörum til hagsbóta fyrir framleiðendur og neytendur.

Þá segir ráðið að 10.000 lítra heimildin hindri nýsköpun og vöruþróun þar sem hámarkið sé svo lágt að það þrengi verulega að þeim aðilum sem þegar framleiði beint frá býli.- mþl