Að hætti ömmu Sirríar

"Núna rignir yfir okkur jólahlaðborðsauglýsingum þar sem taldir eru upp strútshalar í einhverjum framandi sósum, sem enginn kannast við að hafa borðað á jólum! Við vildum búa til heimilislegt "ömmu jólahlaðborð" á Tíu dropum, með smá nýjungum," segir Hermann Fannar Valgarðsson, annar tvíeykisins Hemma og Valda.

Þeir félagar tóku við rekstri kaffihússins Tíu dropa fyrir rúmu ári en fyrir ráku þeir kaffihúsið Nýlenduvöruverzlun Hemma og Valda á Laugaveginum.

Hermann segir kræsingarnar á jólahlaðborði Tíu dropa allar eldaðar upp úr uppskriftum frá fjölskyldum þeirra sjálfra og á matseðlinum má meðal annars sjá rétti eins og Karrísíld með eplum og hænueggjum að hætti ömmu Sirríar.

"Við höfum safnað uppskriftum frá ömmum okkar og víðar. Ragnar Pétursson kokkur býr meðal annars til rækjumús sem mamma hans fann upp og enginn hefur smakkað utan hans fjölskyldu. Ragnar er mjög sniðugur og útsjónarsamur og á matseðlinum er matur sem allir ættu að þekkja en með einhverjum smá breytingum. Þetta eru ekki margir réttir, við vildum frekar gera hvern rétt veglegan. Það fer enginn svangur héðan."

Kaffihúsið Tíu dropar tekur um fimmtíu manns í sæti og verða jólahlaðborðin á fimmtudags-, föstudags- og laugardagskvöldum. Hermann lofar huggulegri stemmingu, gestir þurfi ekki að flýta sér að borða.

"Fólk getur setið rólegt fram eftir kvöldi. Það er sniðugt fyrir hópa að koma saman á Tíu dropa því héðan er stutt að rölta í gleði í bænum eftir matinn. Eins verða óvænt skemmtiatriði á jólahlaðborðinu og eins víst að harmonikkuleikari detti inn og taki nokkur lög."

heida@frettabladid.is