Bíll missti afl og brann

Bíll brann á Suðurlandsvegi við Þrengslaveg um níu leytið í gærkvöldi. Ökumaður fann reykjarlykt og stöðvaði bílinn þegar hann missti afl og drap á sér. Við nánari athugun sá maðurinn eld í framhluta bifreiðarinnar sem breiddist mjög hratt út og bíllinn varð alelda. Slökkvilið kom á staðinn og slökkti eldinn, en bíllinn er gjörónýtur.

Lögreglan á Selfossi stöðvaði kannabisræktun í heimahúsi á Eyrarbakka seinni partinn í gær. Enginn var handtekinn. Um var að ræða á annan tug plantna sem voru haldlagðar af lögreglu.

Einn var tekinn grunaður um akstur undir áhrifum fíkniefna á Selfossi.

Þegar lögreglan var við þyrlueftirlit á Snæfellsnesvegi upp úr miðnætti mældust fimm á of miklum hraða, sá sem hraðast ók var á 145 þar sem hámarkshraði er 90.