Lista fólksins hent út af Facebook

Lista fólksins á Akureyri hefur verið úthýst af samskiptavefnum Facebook. Bæjarfulltrúi L-listans segir ljóst að einhverjir hafi viljað skemma fyrir framboðinu.

L-listinn býður í ár fram í fjórða sinn til bæjarstjórnar á Akureyri. Undanfarin ár hefur framboðið átt einn bæjarfulltrúa í bæjarstjórn, Odd Helga Halldórsson. Nýjustu skoðanakannanir benda til þess að L-listinn njóti aukins stuðnings á Akureyri en framboðið mælist nú með mest fylgi í bæjarfélaginu og með þrjá bæjarfulltrúa.

„Ég var inn á Facebook skömmu fyrir miðnætti í gær og fór meðal annars inn á síðuna okkar. Nokkrum mínútum síðar var hún horfin," segir Oddur. Hann hafi í framhaldinu haft samband við þann sem haldið hefur utan um vefmál L-listans.

„Mér skilst miðað við það sem ég hef lesið um mál Ragnaheiðar Clausen þá er hægt að tilkynna stjórnendum Facebook um eitthvað vafasamt. Ef ákveðið margar ip-tölur segja að síða sé vafasöm er henni bara kippt út og það virðist hafa verið gert í þessu tilfelli," segir Oddur og vitnar til þess þegar Ragnheiði Elínu Clausen, fyrrum sjónvarpsþulu, var tvívegis hent út af Facebook-vinasamfélaginu án skýringa síðasta sumar.

Aðspurður hvort að framboðið muni ekki reyna að fá síðuna opnaða á nýjan leik segir Oddur og hlær: „Ég hef alla mína vitneskju um svona mál úr viðtölum við Ragnheiði sem sagði að það væri alls ekki auðvelt.“

Oddur segir ljóst að einhverjir hafi viljað skemma fyrir Lista fólksins. Við því sé lítið að gera. L-listinn hafa í gegnum árin ekki tekið þátt í pólitískum skotgrafahernaði. „Við munum ekkert bregðast sérstaklega við þessu nema að glotta út í annað og stofna aðdáendasíðu,“ segir Oddur.