Vill rýmka heimildir til makrílveiða

Landbúnaðar- og sjávarútvegsráðherra, Jón Bjarnason, hefur látið breyta reglugerð um stjórn makrílveiða þannig að fiskiskipum sem hafa leyfi til strandveiða verði heimilt að stunda makrilveiðar á handfæri og línu. Veiðarnar eru háðar sérstöku leyfi og skulu takmarkast af þeim 3000 tonnum af makríl sem ráðstafað var til línu- og handfæraveiða á fiskveiðiárinu 2009/2010.

Í tilkynningu frá ráðuneytinu segir að af veiðum og vinnslu á makríl séu almennt góð tíðindi. Þannig hafi þegar veiðst 45 þúsund tonn það sem af er vertíð og ætla megi að yfir 80% aflans hafi farið til manneldisvinnslu. Því sé sérstök ástæða til að skapa svigrúm fyrir nýjar veiðiaðferðir, sem líklegar séu til að skapa grundvöll fyrir fjölbreyttri vinnslu á verðmætum afurðum og auka atvinnu í sjávarbyggðum. Ennfremur þyki eðlilegt, vegna þess hve stutt sé síðan farið var að veiða makríl hér í teljandi magni, að veita fleirum aðgang að veiðunum en þeim sem veitt hafi síðustu árin.