Bandaríkin og England áfram eftir dramatískar lokamínútur - myndband

Það var mikil dramatík í lokaumferð C-riðils á HM í Suður-Afríku í dag. Bandaríkin stóð uppi sem sigurvegari riðilsins eftir dramatískan 1-0 sigur á Alsír og England varð í öðru sæti með 1-0 sigri á Slóveníu.

Jermain Defoe var hetja Englendinga í dag en hann skoraði af stuttu færi á 22. mínútu eftir fyrirgjöf James Milner frá hægri. Báðir komu inn í byrjunarliðið í dag í stað þeirra Emile Heskey og Aaron Lennon.

Englendingar stjórnuðu leiknum í dag og fengu fullt af færum til að bæta við mörkum. Besta færið til að auka forystuna fékk Wayne Rooney þegar hann átti skot sem markvörður Slóveníu varði í stöng. Rooney var svo tekinn af velli þegar um 20 mínútur voru eftir af leiknum en hann var þá byrjaður að haltra.

Slóvenar fengu svo ágæt færi til að jafna metin og það var mikil spenna í leiknum á síðustu mínútunum. Englendingar bökkuðu og ætluðu að verja forskotið en það virtist oft standa tæpt. En taktíkin virkaði og Englendingar fögnuðu sætum sigri.

Þrátt fyrir allt sem hefur gengið á hjá Englandi í keppninni til þessa er liðið enn taplaust og fékk aðeins eitt mark á sig í riðlakeppninni.

Englendingar urðu þó að sætta sig við annað sætið í riðlinum þar sem að Bandaríkin vann Alsír á marki sem var skorað á sama augnabliki og leikur Englands og Slóveníu var flautaður af.

Þeir bandarísku höfðu fengið mýgrút færa til að komast yfir en biðu þar til í uppbótartíma til að skora. Meðal annars skoraði Bandaríkin mark í fyrri hálfleik sem var ranglega dæmt af vegna rangstöðu.

Eftir þunga sókn kom skot að marki sem markvörður Alsír náði ekki að halda. Landon Donovan náði frákastinu og skoraði með föstu skoti við gríðarlegan fögnuð bandarísku leikmannanna.

England mætir því sigurvegaranum í D-riðli á sunnudaginn klukkan 14.00 en Bandaríkin liðinu sem verður í öðru sæti í D-riðli á laugardaginn klukkan 18.30.

Ef Þýskaland vinnur Gana í lokaumferð D-riðils í kvöld eru allar líkur á því að England og Þýskaland muni mætast í 16-liða úrslitunum á sunnudag.