Aurskriða undir Eyjafjöllum: „Auðvitað bregður manni“

„Við sáum þetta bara beint út um gluggann hjá okkur þegar við komum á fætur í morgun," segir Heiða Björg Scheving húsfreyja á bænum Krossafell. Aurskriða féll undir Eyjafjöllum í morgun. Heiða varð vör við skriðuna snemma í morgun og lét húsfreyjuna á bænum Steinar 4 vita, en sá bær er aðeins ofar í hlíðinni.

Mikil rigning hefur verið á svæðinu undanfarna daga og er Skógarfoss til að mynda töluvert grár vegna öskunnar. Skriðan kom úr Steinafjalli og hefur Svaðbælisá runnið yfir þjóðveginn vestan við brúnna.

„Við sáum bara að litli lækurinn okkar, sem rennur hérna rétt hjá okkur, var orðinn að stórfljóti í nótt. Þetta fór út um allt túnið og er töluvert mikið miðað við hvað lækurinn er lítill," segir Heiða. Aðspurð hvernig drulla þetta sé segir hún að það sé mikið af stórum steinum í þessu sem og aur.

Var henni brugðið í morgun þegar hún leit upp í hlíðina? „Auðvitað bregður manni að sjá þegar það er komið skarð í hlíðina og allt í drullu fyrir neðan. Maður er búinn að búast við þessu út af öskufallinu, en ég veit ekkert hvort þetta sé út af því en það er ekkert ólíklegt. Við erum samt ekkert hrædd vði þetta," segir Heiða.

Díana Ágústsdóttir húsfreyja á bænum Steinar 4 segir að Heiða hafi látið sig vita og hafi þá litið út um gluggann og séð skriðuna. „Þetta er örugglega bara svona hundrað metrum frá húsinu okkar og nær alveg niður á veg, innkeyrslan er full af aur," segir Díana sem er þó öllu vön. „Maður er ýmsu vanur, svo maður lætur þetta ekkert á sig fá," segir hún og tekur fram að engin hætta hafi skapast þar sem tunga liggur yfir ofan bæinn sem verji húsið.