Hæstiréttur tekur afstöðu til gæsluvarðhalds á næstu dögum

Hæstiréttur úrskurðar að öllum líkindum í dag eða á morgun í gæsluvarðhaldsmáli Hreiðars Más Sigurðssonar og Magnúsar Guðmundssonar en þeir kærðu gæsluvarðhaldið til réttarins síðastliðinn föstudag. Skýrslutökur sérstaks saksóknara vegna meintra lögbrota í Kaupþingi verður haldið áfram í dag.

Rannsókn málsins stendur enn yfir og hyggst sérstakur saksóknari yfirheyra fjölda manns á meðan Hreiðar Már og Magnús Guðmundsson, tveir af fyrrverandi stjórnendum Kaupþings sitja í gæsluvarðhaldi. Til stendur að yfirheyra Sigurð Einarsson, fyrrverandi stjórnarformann Kaupþings og samstarfsmenn Hreiðars og Magnúsar sem taldir eru geta varpað skýrara ljósi á meint sakarefni.

Búið er að boða Sigurð í skýrslutökur en Ólafur Þór Hauksson sérstakur saksóknari vill ekkert gefa upp um hvort hann hafi svarað kalli embættisins eða hvenær hann hyggist koma til landsins. Samkvæmt upplýsingum frá embættinu er reynt eftir fremsta megni að fá hann til skýrslutöku. Almennt sé það þannig að mæti menn ekki til yfirheyrslu eftir að hafa verið boðaðir gæti komið til handtöku.

Ólafur Þór er hins vegar á leið til Stokkhólms í dag þar sem hann situr fund norrænna efnahagsbrotadeilda. Hann er væntanlegur til landsins á miðvikudag.

Hreiðar Már og Magnús hafa setið í gæsluvarðhaldi á Litla hrauni frá því á fimmtudag en þeir kærðu úrskurð Héraðsdóms Reykjavíkur til Hæstaréttar á föstudag. Hreiðar Már var úrskurðaður í 12 daga gæsluvarðhald og Magnús í viku. Líkur eru á að Hæstiréttur úrskurði í málinu í dag eða á morgun.