Chelsea að kaupa serbneskan landsliðsmann

Félagið MFK Kosice frá Slóvakíu hefur staðfest að miðjumaðurinn Nemanja Matic sé á förum til Chelsea eftir að kaupverð upp á 1,75 milljónir punda var samþykkt.

Matic lét sjálfur hafa eftir sér um helgina að hann myndi skrifa undir fjögurra ára samning við Lundúnafélagið.

Matic er serbneskur og lék með U-21 árs landsliði Serba á Evrópukeppni U-21 árs landsliða síðasta sumar en hann hefur einnig leikið tvo leiki með A-landsliði Serba.

Chelsea náði að slá Tottenham, Genoa og CSKA Moskva við með því að fá Matic en hann hefur verið sterklega orðaður við félagsskipti frá MFK Kosice í allt sumar.