Ögmundur vildi að bankinn héti Búnaðarbankinn

„Mikið liði mér betur sem viðskiptavini hjá Búnaðarbankanum en Arion group. Hef grun um að það eigi við um fleiri," segir Ögmundur Jónasson, þingmaður VG, á vefsíðu sinni. Eins og kunnugt er var tilkynnt á föstudag um að Nýi Kaupþing skyldi heita Arion banki hér eftir.

Nafngiftin vekur athygli enda var Arion heiti á dótturfyrirtæki Nýja Kaupþings líkt og Glitnir var heiti á dótturfyrirtæki Íslandsbanka. Glitnir fór síðan í fjárfestingar sem enduðu með skelfingu, en þá var nafni bankans breytt aftur í Íslandsbanki.

Og Ögmundur velkist ekki í vafa um það hvert menn ætla með Arion. „Nafngiftin Arion - með sögu sína frá fornu fari og arfleifð hér á landi sem verðbréfafyrirtæki - segir mér hvert draumar manna á þessum bænum stefna,“ segir Ögmundur.