Umfjöllun: Von Fjölnis veiktist eftir tap gegn FH

Það er ólík staða á liðunum tveimur sem mættust í eina leik dagsins í Pepsi-deild karla. FH-ingar færðust nær Íslandsmeistaratitlinum með 4-1 útisigri á Fjölni en Grafarvogsliðið færðist um leið nær 1. deildinni.

Atli Viðar Björnsson kann greinilega vel við sig í Grafarvoginum því hann skoraði tvívegis í dag. Hann braut ísinn eftir um stundarfjórðung þegar heimamenn gleymdu sér í vörninni, Atli fékk langa sendingu frá Birni Daníeli Sverrissyni og vippaði knettinum yfir Þórð Ingason í Fjölnismarkinu.

Um þremur mínútum síðar fengu FH-ingar síðan vítaspyrnu þegar Ólafur Páll Johnson braut á Atla Viðari. Tryggvi Guðmundsson steig á punktinn og skoraði af miklu öryggi. Íslandsmeistararnir fóru með tveggja marka forystu inn í hálfleikinn.

Heimamenn komu ákveðnir til leiks í seinni hálfleik og sköpuðu mikla hættu við mark FH. Það skilaði sér í marki á 51. mínútu en það skoraði hinn ungi Aron Jóhannsson með stórglæsilegu skoti. Það virtist of mikið púður hafa farið í að minnka muninn því Fjölnisliðið náði ekki að fylgja þessu marki eftir.

FH-ingar náðu völdum á vellinum og Björn Daníel Sverrisson jók forystuna þegar hann skoraði af stuttu færi eftir að Tryggvi Guðmundsson skallaði knöttinn til hans. Þetta mark gerði út um leikinn og aldrei spurning um sigur FH eftir það. Atli Viðar rak síðasta naglann í Fjölniskistuna í lokin þegar hann skoraði eftir fyrirgjöf frá Viktori Erni Guðmundssyni.

Bæði lið urðu fyrir skakkaföllum fyrir þennan leik en þau höfðu augljóslega meiri áhrif á Fjölnisliðið sem býr ekki yfir sömu breidd og Íslandsmeistararnir. Fjórir byrjunarliðsmenn Fjölnis tóku út leikbann og þá mun markvörðurinn Hrafn Davíðsson ekki leika meira á tímabilinu þar sem hann er farinn út í nám.

Brekkan framundan er brött fyrir Fjölnismenn... því miður fyrir þá virðist hún vera orðin of brött.

Fjölnir - FH 1-4

0-1 Atli Viðar Björnsson (15.)

0-2 Tryggvi Guðmundsson (víti 18.)

1-2 Aron Jóhannsson (51.)

1-3 Björn Daníel Sverrisson (62.)

1-4 Atli Viðar Björnsson (90.)

Fjölnisvöllur. Áhorfendur: 889.

Dómari: Einar Örn Daníelsson 8

Skot: 9-13 (á mark: 4-7)

Varin skot: Þórður 3 - Daði 3

Hornspyrnur: 8-6

Rangstöður: 5-1

Aukaspyrnur fengnar: 11-11

Fjölnir (4-5-1):

Þórður Ingason 6

Illugi Gunnarsson 4

Ólafur Johnson 4

Geir Kristinsson 5

Marinko Skaricic 3

(64. Olgeir Óskarsson 5)

Ágúst Ágústsson 4

Kristinn Freyr Sigurðsson 6

Aron Jóhannsson 6

(58. Guðmundur Karl Guðmundsson 6)

Gunnar Már Guðmundsson 6

Tómas Leifsson 6

Jónas Grani Garðasson 5

FH (4-3-3):

Daði Lárusson 7

Pétur Viðarsson 6

Sverrir Garðarsson 7

Freyr Bjarnason 8 - Maður leiksins

Viktor Guðmundsson 7

Dennis Siim 6

Davíð Þór Viðarsson 7

Björn Daníel Sverrisson 7

(87. Hákon Atli Hallfreðsson -)

Matthías Vilhjálmsson 6

Tryggvi Guðmundsson 7

(90. Brynjar Benediktsson -)

Atli Viðar Björnsson 8