Auðun: Þurfum að eiga toppleik

„Við þurfum að eiga algjöran toppleik til að komast áfram," segir Auðun Helgason, fyrirliði Fram. Safamýrarliðið mætir Sigma Olomouc frá Tékklandi öðru sinni í kvöld í Evrópudeild UEFA. Leikurinn hefst klukkan 19:00 á Laugardalsvelli.

Fyrri leikurinn sem fram fór í Tékklandi fór 1-1 sem eru frábær úrslit fyrir Framara. Ljóst er að Sigma þarf að skora í kvöld til að komast áfram því með markalausu jafntefli fer Fram áfram á útivallarmarki.

„Það er gott að vera búinn með þetta bann og geta tekið þátt," segir Auðun sem hefur ekki getað tekið þátt í Evrópuævintýri Fram hingað til vegna leikbanns sem hann fékk eftir að hafa fengið rautt spjald í Evrópuleik með FH gegn Bate Borisov 2007.

„Ég var kominn með tvö gul spjöld eftir 40 mínútna leik í Hvíta-Rússlandi og brást illa við því. Ég var svo dæmdur í þriggja leikja bann sem er virkilega strangt og ekki í takt við margt annað. Dómarar eiga það til að vera eitthvað smeykir þegar þeir dæma í Austur-Evrópu, maður hefur fengið að kynnast því."

Auðun hefur þó farið með Fram í útileikina, bæði til Tékklands og til Wales. „Það hefur verið virkilega gaman enda gengið mjög vel. Ég hef reynt að lifa mig inn í þetta og hjálpað eins og ég get. Það var náttúrulega frábært að sjá hve vel liðið spilaði í Tékklandi," segir Auðun.

„Það er algjört lykilatriði í þessum seinni leik að við verðum með öflugan varnarleik. Leikurinn verður líklega þannig að Sigma verður með knöttinn lungan af leiknum og við verðum að koma í veg fyrir að þeir komist í skotfæri. Þeir hafa marga mjög sterka leikmenn. Það er enginn sem gerir kröfu á okkur að komast í næstu umferð svo menn ættu að mæta nokkuð afslappaðir í þennan leik," segir Auðun Helgason.