Ólafur Kristjánsson: Lítil uppskera

Ólafur Kristjánsson þjálfari Breiðabliks neitaði því ekki að fallbarátta blasi við Blikum fari liðið ekki að safna stigum hið snarasta.

"Við vorum allt of linir í upphafi leiks. Við gáfum of mikið eftir og vorum of langt frá þeim.Við lentum undir, bæði hvað varðar stöðuna og eins í allri baráttu. Við löguðum þetta aðeins og þéttum okkur. Mér fannst 20 mínútur í fyrri hálfleiks og upphafi síðari í fínu lagi," sagði Ólafur skömmu eftir að leik lauk.

"Þeir koma alltaf inn í leikina aftur. Þeir sköpuðu sér í sjálfu sér engin færi. Þeir voru mikið með boltann en við lögðumst aftarlega og ætluðum að beita skyndisóknum á þá. Við erum með lið sem hafði fengið á sig átta mörk í tveimur leikjum. Við ætluðum að vinna þetta út frá vörninni."

"Þeir setja þetta annað mark á okkur og við reynum og puðum og mér fannst það jákvætt. Menn gáfust ekki upp þó þeir hafi misst aðeins móðinn í restina."

Blikar hafa hægt en örugglega dregist niður í fallbaráttuna enda hefur stiga söfnin gengið hægt upp á síðkastið. "Ef þú færð ekki stig og hin liðin fá stig ferðu að snerta þessa fallbaráttu. Við vorum á lygnum sjó og höfðum möguleika á því að slíta okkur frá henni en stigalega hefur uppskeran ekki verið góð í vikunni. Við erum að sogast niður og það er verkefni sem við þurfum að takast á við," sagði Ólafur að lokum.