Lampard: Látið Rio í friði

Frank Lampard, leikmaður Chelsea og enska landsliðsins, hefur beðið gagnrýnendur um að láta Rio Ferdinand í friði en Rio átti sök á atvikinu sem leiddi til þess að Robert Green var vísað af velli gegn Úkraínu.

„Stöðugleiki Rios með Terry í vörninni á síðustu 4-5 árum hefur sett þá á stall með bestu miðvarðapörum heims í dag. Þið getið spurt hvern sem er og allir myndu segja það sama og ég," sagði Lampard.

„Mér finnst það vera afar óheppilegt að það þurfi alltaf einhverjir einn til tveir leikmenn að fá einhverja útreið eftir leiki. Það þarf ekki að vera þannig, við eigum að fylkja okkur á bak við leikmennina," sagði Lampard og bætti við.

„Allir í hópnum standa þétt á bak við Rio og þjálfarinn líka. Þetta voru tvö lítil mistök. Rio hefur verið frábær í langan tíma. Þegar stóru leikirnir koma þá þurfum við okkar bestu leikmenn og þá mun Rio skila sínu."