Moyes játar sig sigraðan - Lescott á leið til City

Knattspyrnustjórinn David Moyes hjá Everton hefur viðurkennt að það sé lítið gagn af því að halda varnarmanninum Joleon Lescott hjá félaginu gegn vilja leikmannsins.

Everton er þegar búið að hafna tveimur kauptilboðum í Lescott frá Manchester City, upp á 15 og 18 milljónir pund, auk þess að hafna beiðni leikmannsins að vera settur á sölulista.

Lescott hefur brugðist illur við og neitað að mæta á æfingar og lokaundirbúning fyrir mikilvægan leik í Evrópudeild UEFA með Everton og Moyes er sagður vera búinn að fá sig fullsaddann á þessu máli öllu saman.

„Ég vildi halda Lescott áfram hjá Everton þar sem hann er mjög góður leikmaður og getur leyst tvær stöður á vellinum en eins og hann er búinn að haga sér síðustu vikur þá er það mjög erfitt.

Hann sagði mér til að mynda daginn fyrir 1-6 tapið gegn Arsenal að hann vildi ekki spila leikinn en ég átti engra annarra kosta völ en að spila honum og ég held að það hafi ekkert leynt sér hversu vond áhrif þetta mál hefur haft á liðið," segir Moyes.

Talið er að City hafi lagt fram þriðja kauptilboðið í Lescott upp á 21 milljón punda og að Everton sé nú reiðubúið að taka því.