Í sjokki eftir brotsjó - myndir

„Við erum svona að jafna okkur. Þetta var auðvitað sjokk," segir Unnsteinn Líndal Jensson, skipstjóri línubátsins Sighvats GK 57, en brotsjór lenti á bátnum með þeim afleiðingum að sjór flæddi inn og tveir sjómenn slösuðust. Sauma þurfti sex spor í augabrún annars þeirra.

Báturinn var staddur við Óðinsboða út af Horni á laugardagskvöldinu þegar brotið lenti á bátnum. Að sögn Unnsteins var veður tiltölulega gott og skall aldan því mjög óvænt á bátinn bakborðsmegin.

„Við vorum að draga línu um hálf tólf leitið um kvöldið. Veðrið var norðaustan 15 metrar á sekúndu þegar við fáum skyndilega á okkur tvo straumhnúta," lýsir Unnsteinn. Öldurnar skullu á bátinn og flæddi sjór niður um dráttarlúgu og þaðan inn í vistarverur. Tveir sjómenn sem voru að störfum í lestinni köstuðust til þegar sjórinn lenti á þeim. Annar þeirra skarst á styttu sem hann lenti á.

„Það blæddi talsvert úr honum," segir Unnsteinn en sjómaðurinn heitir Róbert Karol. Myndin af honum var tekin 40 mínútum eftir að brotstjórinn skall á bátnum.

Spurður hvort sjómennirnir hafi verið í hættu segir Unnsteinn að svo hafi í raun ekki verið. Þeir náðu tökum á ástandinum á nokkrum mínútum. Báturinn hallaði aðeins að sögn Unnsteins en ekki þannig að hætta skapaðist af.

Unnsteinn segir að þeir hafi þegar látið nærliggjandi skip vita af hremmingunum og voru þeir í viðbragðsstöðu ef ske kynni að sjómennirnir þyrftu aðstoð. Það reyndi þó aldrei á þá aðstoð.

Því næst sigldi Unnstein skipinu í höfn þar sem var svo gert að sárum mannanna. Í ljós kom að sauma þurfti sex spor í augabrúnina á Róberti sem skall á styttuna. Hinn sjómaðurinn er farinn aftur út á sjó.

„Það er ágætur andi um borð. Atvikið vakti alla til umhugsunar," segir Unnsteinn sem sjálfur hefur verið til sjós í átján ár. Hann hefur þó aldrei lent í álíka hremmingum.

„Þetta sjómannslíf er bara eins og það hefur alltaf verið," segir Unnsteinn og bendir á að íslensk veðrátta hafi lítið breyst og hætturnar séu alltaf til staðar á sjónum.

Hann segir þungt í sjónum þessa daganna en undanfarið hafa þeir verið að veiða hlýra og þorsk. Unnsteinn segir þá reyna að veiða ýsuna en það hafi gengið illa.

Þrátt fyrir hremmingar á sjó úti þá er Unnsteinn með hugann við stjórnmálin í landi. Hann er ósáttur við boðaðar aðgerðir ríkisstjórnarinnar um að afnema sjómannaafsláttinn. „Ef þeir horfa í milljarð þá spyr maður um þá 7 milljarða sem kostar að halda úti ríkisstarfsmönnunum og rekstrakostnaður allt þar í kring. Á meðan erum við að skaffa tæpan helming af gjaldeyristekjunum," segir Unnsteinn sem þykir það ekki góð hugmynd að afnema afsláttinn. Hann segir að ef fjármálaráðherrann, Steingrímur J. Sigfússon, sé ekki sannfærður um erfitt sjómannslíf, þá ætti hann að kíkja á fimm daga túr með þeim félögum.