Talsmaður Al-Fahim segir yfirtökuna á Portsmouth enn standa til

Aðdáendur enska úrvalsdeildarfélagsins Portsmouth hafa ekki verið í rónni síðustu vikur út af mikilli óvissu um framtíð félagsins en breskir fjölmiðlar greindu frá því um helgina að fyrirhuguð yfirtaka Sulaiman Al-Fahim væri að falla upp fyrir og félagið gæti endað í greiðslustöðvun og verið dæmt niður um deild.

Talsmaður Al-Fahim segir hins vegar yfirtökuna vera á réttri leið.

„Yfirtakan stendur til og hefur alltaf staðið til. Þess vegna var Al-Fahim til að mynda á leik Portsmouth og Fulham í fyrstu umferð ensku úrvalsdeildarinnar," segir Ivo Ilic talsmaður Al-Fahim.