Bankasýslan auglýsir eftir stjórnarmönnum í ríkisfyrirtæki

Bankasýsla ríkisins auglýsir eftir fólki sem vill sitja í stjórnum opinberra fjármálafyrirtækja í fréttatilkynningu sem send er fjölmiðlum í dag.

Í tilkynninguni segir að valnefnd skipuð af stjórn Bankasýslu ríkisins, sem tilnefnir fulltrúa ríkisins til setu í stjórnum fjármálafyrirtækja sem stjórnvöld hafa tekið ákvörðun um að eignast hlut í, vilji vekja athygli á að einstaklingar sem telja sig uppfylla hæfisskilyrði fyrir setu í bankaráðum og stjórnum fjármálafyrirtækja og 3. gr. starfsreglna valnefndar geti gefið kost á sér til stjórnarsetu með því að senda valnefnd ferliskrár sínar á netfangið valnefnd@bankasysla.is.

Við ákvörðun um tilnefningu á stjórnarmanni mun valnefndin taka mið af yfirsýn, þekkingu og reynslu viðkomandi í tengslum við fyrirtækjarekstur og starfshætti fjármálafyrirtækja. Nefndin mun huga að þörfum hvers fyrirtækis fyrir sig og tilnefna stjórnarmenn sem hafa fjölbreyttan bakgrunn hvað varðar menntun og hæfni.