Bjóða upp á hugvekju við setningu Alþingis

Alþingi verður sett á fimmtudaginn en löng hefð er fyrir því að setningin hefjist með guðsþjónustu í Dómkirkjunni. Við síðustu þingsetningu varð breyting þar á þegar Siðmennt bauð þeim alþingismönnum sem ekki kjósa að ganga til kirkju upp á annan valkost.

Í tilkynningu frá Siðmennt í kvöld segir að félagið sem er félag siðrænna húmanista á Íslandi, ætli að bjóða alþingismönnum aftur að koma á Hótel Borg áður en þing er sett fimmtudaginn 1. október kl. 13:30 og hlýða á Steinar Harðarson, athafnarstjóra, flytja hugvekju um gagnrýna hugsun.

Allir alþingismenn, sem og aðrir borgarar, eru hjartanlega velkomnir til að eiga stutta samverustund óháð öllum trúarsetningum áður en þeir ganga til þingstarfa.