Níu lykilmenn Grindavíkur í sóttkví með einkenni svínaflensu

Ástandið hjá knattspyrnuliði Grindavíkur er ekki gott en alls liggja níu leikmenn liðsins í rúminu veikir. Þeir eru þess utan með einkenni svínaflensu þannig að þeim er haldið í sóttkví þar til úr fæst skorið hvort þeir séu með svínaflensu eður ei.

Flestir þessara leikmanna eru algjörir lykilmenn í liði Grindavíkur. Leikmennirnir sem eru veikir eru Scott Ramsay, Óli Stefán Flóventsson, Zoran Stamenic, Orri Freyr Hjaltalín, Óli Baldur Bjarnason, Páll Guðmundsson, Bogi Rafn Einarsson, Emil Daði Símonarson og Norðmaðurinn Tor Erik Moen sem gekk í raðir Grindavíkur á dögunum.

„Það er einhver pest í gangi og þeir eru allir nýlagstir í rúmið. Þetta hefur verið svolítið skrítið því sumir hafa veikst mjög skyndilega og það illa. Það er eitthvað misjafnt hvort allir séu með einkenni svínaflensunnar en menn verða í sóttkví þar til niðurstöður liggja fyrir," sagði Ingvar Guðjónsson, framkvæmdastjóri knattspyrnudeildar Grindavíkur, við Vísi.

Að sögn Ingvars hafa ekki allir leikmennirnir enn gefið sýni en þeir sem hafa gert það fá niðurstöðu í dag eða á morgun. Á meðan verður gætt ítrustu varúðar.

Grindavík á leik næsta sunnudag gegn ÍBV og leikur eina þrjá leiki á sjö dögum.

„Við höfum látið KSÍ vita af málinu en þeir hafa ekkert gefið út á hvort við fáum einhvern liðleika ef á þarf að halda. Það er samt ekki gott fyrir okkur því við eigum þegar einn frestaðan leik inni. Að sama skapi er eflaust ekkert vinsælt að við séum að mæta í leiki nema það sé ljóst hvað sé að okkar leikmönnum," sagði Ingvar.

Þess má síðan geta að aðeins sjö leikmenn voru á æfingu hjá Grindavík í gær.