Petrov vonar að Barry verði fagnað á Villa Park

Miðjumaðurinn Stiliyan Petrov hjá Aston Villa bindur vonir við að fyrrum liðsfélagi sinn Gareth Barry hjá Manchester City fái hlýjar móttökur þegar liðin mætast á Villa Park-leikvanginum á mánudag.

Barry ákvað að breyta um umhverfi í sumar eftir 12 ára veru hjá Aston Villa og Petrov vonar að stuðningsmenn Aston Villa muni ekki gleyma því.

„Ef einhver á skilið að fá góðar móttökur þá er það Barry. Hann gaf mikið til félagsins á þeim tíma sem hann var hjá Aston Villa og spilaði yfir 400 leiki. Hann er líka alltaf að senda sms-skilaboð þegar vel gengur hjá Aston Villa og það sýnir bara að hann hefur ekki gleymt félaginu," segir Petrov í viðtali við Sky Sports fréttastofuna.