Eyjólfur heldur að Stjörnumenn leggi FH-inga

Fjórir leikir eru í Pepsi-deild karla í kvöld og hefjast þeir allir klukkan 19:15. Vísir fékk Eyjólf Sverrisson, þjálfara U21 landsliðsins, til að spá fyrir um úrslit leikja kvöldsins. Hann spáir jafntefli allstaðar nema í Garðabænum.

Fram - Keflavík 2-2

„Framarar eru sterkir á heimavelli og hafa verið að spila vel undanfarið. Keflvíkingar hafa einnig verið á siglingu og það er yfirleitt skorað mikið í leikjum hjá þeim. Ég hef því 2-2 á tilfinningunni."

Grindavík - Valur 1-1

„Ég spái jafntefli þar líka. Ef veðrið verður eins og stefnir í þá getur þetta orðið smá fótboltaleysa en það gætu slysast inn einhver mörk."

Stjarnan - FH 2-1

„Ég held að Stjarnan vinni þennan leik. Þeir hafa ekki tapað á heimavelli. Ég held að það sé komið að því að Íslandsmeistararnir verði stöðvaðir."

Breiðablik - Fylkir 1-1

„Fylkismenn hafa verið öflugir á útivöllum en ég spái jafntefli þarna líka. Bæði lið hafa aðeins verið að reyna að finna sig aftur, þau hafa aðeins verið að gefa eftir í síðustu leikjum. Ég reikna með að þau leggi áherslu á að vera þétt fyrir í kvöld."

Fylgst verður grannt með gangi mála í leikjum kvöldsins á Boltavakt Vísis og Fréttablaðsins.