Óli Stefán: Ekkert gaman að vera í rauðu sætunum

Óli Stefán Flóventsson er kominn aftur í lið Grindavíkur eftir dvöl hjá Fjölni og í Noregi. Hann var mjög sáttur með sigurinn og leik Grindvíkinga gegn Val í kvöld.

"Ég get ekki verið annað en mjög ánægður með mjög agaðan og flottan leik, hreinlega allan pakkann. Þeir lágu aðeins á okkur en við nýttum okkur skyndisóknir og okkar tækifæri mjög vel. Það fór aðeins um kallinn þegar þeir minnkuðu muninn í 2-1, ég viðurkenni það fúslega, en síðan fórum við að ná tökum á leiknum aftur og mér fannst þetta nokkuð öruggt undir lokin," sagði Óli Stefán í samtali við Vísi eftir leikinn.

"Það var kannski ágætt að fá á sig þessa köldu vatnsgusu þegar þeir minnkuðu muninn. Við vorum svolítið búnir að bíða eftir markinu hjá þeim. En þá fórum við að halda boltanum og spila betur og ég er mjög ánægður hvernig við náum að vinna okkur út úr því að þeir minnka muninn," bætti Óli Stefán við.

Grindvíkingar unnu sig upp úr fallsæti með sigrinum og sitja nú í 9.sæti deildarinnar með 15 stig.

"Það er léttir að vera komnir úr fallsæti. Það er ekkert sérstaklega gaman að vera þarna í rauðu sætunum en það er nóg eftir og þetta er aðeins dropi í hafið í því sem koma skal," sagði Óli Stefán að lokum en hann átti fínan leik í vörn Grindavíkur í kvöld.