Benitez: Leikmenn vildu sanna sig

Rafael Benitez, stjóri Liverpool, hrósaði leikmönnum sínum fyrir að hafa brugðist vel við þeirri gagnrýni sem liðið hefur mátt þola undanfarna daga.

„Allir okkar leikmenn vildu virkilega standa sig vel í dag. Steven Gerrard og Fernando Torres voru á meðal þeirra sem vissu að þeir þyrftu að gera betur," sagði Benitez.

„Við sýndum að við höfum úrvalsleikmenn og þeir börðust allir grimmilega til að sýna að þeir gætu betur. Við réðum leiknum lengstum og að fá tvö mörk á sig var svekkjandi. Liðið kom samt til baka og sýndi hversu gott það er."

Sean Davis hjá Bolton fékk rautt spjald í stöðunni 2-1 fyrir Bolton. Benitez sagði rauða spjaldið hafa verið réttmætt.

„Þegar þú brýtur á einhverjum svona aftanfrá þá er það gult spjald. Þarf ekkert að ræða það."