Fjórir leikmenn til Portsmouth

Portsmouth hefur styrkt leikmannahópinn fyrir komandi átök í ensku úrvalsdeildinni en fjórir leikmenn gengu til liðs við félagið í dag.

Félagið keypti þá Michael Brown frá Wigan og Kevin-Prince Boateng frá Tottenham. Þá komu þeir Aruna Dindane og Jamie O'Hara á lánssamningum. Dindane er á mála hjá Lens en O'Hara skrifaði undir fjögurra ára samning við Tottenham áður en gengið var frá lánssamningi hans við Portsmouth.

Portsmouth greiddi Tottenham fjórar milljónir punda fyrir Boateng en hann kom til síðarnefnda félagsins fyrir 5,4 milljónir punda fyrir tveimur árum síðan. Hann fékk þó fá tækifæri hjá Tottenham og var aðeins tíu sinnum í byrjunarliðinu.

Félagið keypti Brown á talsvert lægri upphæð og á möguleika á að kaupa Dindane í lok leiktíðarinnar. Lánssamningur O'Hara gildir til áramóta en sá möguleiki er fyrir hendi að framlengja hann út leiktíðina.