Capello stendur frammi fyrir erfiðu vali

Fabio Capello viðurkennir að hann standi frammi fyrir erfiðu vali þegar kemur að því að velja sóknarmenn í byrjunarliði enska landsliðsins sem mætir Króatíu í undankeppni HM 2010 á miðvikudaginn.

Jermain Defoe, leikmaður Tottenham, hefur verið duglegur að skora með enska landsliðinu að undanförnu. Hann kom inn á sem varamaður hjá Englandi í gær og skoraði annað marka liðsins í 2-1 sigri á Slóveníu.

Capello þarf nú að ákveða hvort að Wayne Rooney og Emile Heskey verði áfram saman í framlínu Englands eða hvort öðrum þeirra verði fórnað fyrir Defoe.

„Þegar Defoe spilar í síðari hálfleik þá skorar hann," sagði Capello eftir leikinn í gær. „Ég þarf nú að velja byrjunarliðið og hef ég tíma til þess."

Defoe hefur alls skorað átta mörk með landsliðinu síðan að Capello tók við. Wayne Rooney er þar að auki markahæsti leikmaður undankeppni HM 2010 í Evrópu með átta mörk.

„Allir vilja spila og enginn vill sitja á bekknum," sagði Defoe sem hefur skorað fjögur mörk í fyrstu fjórum leikjum Tottenham á tímabilinu. „En ef ég get komið inn á og hjálpað til þá geri ég það. Það er stjórinn sem velur liðið."