Rafa Benitez ekki á förum frá Liverpool

Sá orðrómur komst á kreik í gærdag fyrir leik Liverpool og Stoke í ensku úrvalsdeildinni að knattspyrnustjórinn Rafa Benitez hjá Liverpool væri á mörkum þess að hætta hjá félaginu og hefði setið krísufund með hinum bandarísku eigendum, George Gillett og Tom Hicks.

Ástæða Benitez fyrir að yfirgefa Anfield átti að vera sú að hann hafi ekki fengið nægilega mikið fjármagn til kaupa á nýjum leikmönnum eftir söluna á Xabi Alonso og Alvaro Arbeloa til Real Madrid.

Christian Purslow sem hefur tekið við flestum skyldum Rick Parry, fyrrum stjórnarformanns Liverpool, hjá félaginu segir ekkert vera til í sögusögnunum.

„Þetta er algjör þvættingur og tómur uppspuni. Ég vissi ekki einu sinni af þessu fyrr en í gærkvöldi og ég borðaði meðal annars með Rafa fyrir leik og það segir ef til vill allt um hvað þetta var mikil lygi," segir Purslow í viðtali við The Sun.

Benitez sjálfur ítrekaði í viðtölum í leikslok eftir 4-0 sigurinn í gær að hann væri ekki á förum frá félaginu. „Ég er hundrað prósent trúr félaginu, leikmönnum þess og aðdáendum Liverpool."