Gary Neville: Meiðslamartröðin vonandi á enda

Gary Neville hefur lítið getað spilað með Manchester United undanfarin tvö ár vegna meiðsla. Hann vonast nú til þess að geta fara hjálpað liðinu á ný og að hann sé laus við meiðslin.

Neville ökklabrotnaði í leik á móti Bolton snemma árs 2007 og það tók hann tólf mánuði að komast aftur í slaginn. Endurkoman hefur hinsvegar gengið mjög hægt því hann hefur lent í allskyns vöðvatognunum og því lítið sem ekkert getað spilað undanfarin tvö tímabil.

„Ég vona að ég komist í gott form og nái að spila leiki fyrir félagið. Ég geri allt sem ég get til þess og læknaliðið er á fullu að hjálpa mér," segir Gary Neville.

Neville óttast ekkert samkeppnina um hægri bakvarðastöðuna en Wes Brown, John O'Shea, Rafael og Fabio geta allir spilað þar. „Stjórinn hefði mig ekki með ef en hann teldi mig ekki getað hjálpað liðinu á einhvern hátt. Ég get skilað mun meiru þegar ég er kominn í form og orðinn góður af meiðslunum," segir Neville.

„Meiðslin hafa angrað mig síðustu ár og þetta hefur verið mjög pirrandi. Þetta er versta martröð allra fótboltamanna en ég vona að mín martröð sé á enda," sagði Neville.