Benitez: Danir fara vonandi varlega með Agger

Knattspyrnustjórinn Rafa Benitez hjá Liverpool hefur viðurkennt að hann sé á nálum yfir því að varnarmaðurinn Daniel Agger hafi verið kallaður inn í danska landsliðið eftir að vera nýbúinn að ná sér af erfiðum bakmeiðslum.

Agger sagði sjálfur í viðtölum að hann hafi velt því fyrir sér að leggja skóna á hilluna útaf meiðslunum.

„Hann spilaði í 68 mínútur með varaliðinu og var í hópnum gegn Chelsea en ekki klár til þess að byrja leikinn. Við erum því að reyna að vernda hann eins mikið og við getum og nú er hann með danska landsliðinu og ég vona svo sannarlega að Danirnir fari einnig varlega með Agger.

Það er vissulega gott fyrir hann að fá leiki en það verður að fylgjast náið með honum," segir Benitez í viðtali á opinberri heimasíðu Liverpool.