Bandarískt fjárfestingarfyrirtæki vill kaupa Newcastle

Geoff nokkur Sheard hefur staðfest að hann sé að hjálpa ónefndu bandarísku fjárfestingarfyrirtæki að kaupa Newcastle en Sheard þessi reyndi sjálfur að yfirtaka Sheffield Wednesday á síðustu leiktíð en án árangurs.

Sheard kveðst þó í þetta skipti ekki vera sjálfur að leggja fram peninga heldur sé hann einungis að aðstoða áðurnefndan aðila í viðræðum eiganda Newcastle.

Enska b-deildarfélagið má muna sinn fífil fegurri en eigandinn Mike Ashley hefur þegar sett 100 milljón punda verðmiða á félagið. Hvort af kaupum Bandaríkjamannanna verði kemur væntanlega í ljós á næstu dögum en viðræður hafa nú staðið yfir í tvær vikur.

Sheard gaf í skyn að Bandaríkjamennirnir hafi áhuga á að fá Newcastle goðsögnina Alan Shearer til þess að taka við knattspyrnustjórn Newcastle að nýju, líkt og hann gerði undir lok síðasta keppnistímabils, en Chris Hughton fer nú tímabundið með knattspyrnustjórn félagsins.