Wenger: Ég mun ekki velja arftaka minn

Arsene Wenger, knattspyrnustjóri Arsenal, segir það ekki vera í sínum verkahring að taka ákvörðun um hver taki við af sér þegar hann hætti á endanum.

„Ég á mjög sterkt samband við þetta félag en mér hefur alltaf fundist mikilvægt að allir geri það sem þeir fái borgað fyrir að gera," sagði Wenger sem er þó til í að vera félaginu innan handar.

„Ef félagið biður mig um ráðgjöf og skoðun á eftirmanni þá mun ég gera það en ég mun ekki stinga upp á neinum sérstökum enda er það ekki mitt verk. Ég vil bara sinna mínu starfi."

Wenger segir að draumurinn sé að skilja við félagið í frábæru ásigkomulagi með gríðarlega sterkt lið í höndunum.