Kynferðisfórnalamb stökk út úr bíl á ferð

Nítján ára stúlka sem hefur kært nauðgun í Tryggvagötu stökk út úr leigubíl á ferð á Bústaðavegi eftir kynferðisbrotið.

Hún sakar perúska bræður um að hafa nauðgað sér í bíl við Tryggvagötuna í byrjun maí. Báðir eru bræðurnir dyraverðir á skemmtistöðum í miðborg Reykjavíkur. Þeir voru við störf sömu nótt.

Eftir að nauðgunin á að hafa átt sér stað hljóp stúlkan í geðshræringum að Höllabátum þar sem hlúð var að henni. Annar bróðirinn á að hafa kallað á eftir henni á spænsku: Mella.

Í kjölfarið tók stúlkan leigubíl ásamt vini sínum. Þegar þau voru komin á Bústaðaveg stökk stúlkan út úr bílnum á ferð. Lögreglan var kölluð á vettvang. Þegar rætt var við leigubílstjórann sagði hann að stúlkan hefði sagt að sér hefði verið nauðgað. Þá kom í ljós að stúlkan var í miklu tilfinningalegu áfalli.

Hæstiréttur úrskurðaði í gær að það skyldi sleppa öðrum manninum úr gæsluvarðhaldi. Hæstiréttur segir ástæðuna að ekki sé kominn nægilega rökstuddur grunur um að maðurinn hafi gert það sem hann er sakaður um.

Báðir bræðurnir eru þá lausir.

Kynferðisbrotadeildin hefur lýst eftir vitnum sem gætu hafa séð til stúlkunnar eða mannanna þessa nótt. Að sögn yfirmanns kynferðisbrotadeildarinnar, Björgvins Björgvinssonar, þá hefur engin gefið sig fram.

Spurður hvernig rannsókn miði svarar Björgvin að rannsóknin haldi bara áfram.