Arnór Gauti 10 ára: Spilar á Old Trafford í dag

Arnór Gauti Brynjólfsson er tíu ára gamall fótboltastrákur úr Fylki. Hann er reyndar búsettur í Dubai um þessar mundir en þar sigraði hann í knattþrautum í útibúi knattspyrnuskólan Manchester United.

Arnór er nú staddur í Manchester en þar er einnig íslensk stúlka sem heitir Gunnhildur Ásmundsdóttir og er þrettán ára. Hún æfir með Þrótti.

Í gær voru þrautir þreyttar á Carrinton æfingasvæði Man Utd, auk þess sem krakkarnir hittu allar helstu stjörnur aðalliðsins. Í sjálfum þrautunum sá meðal annars hinn norski Ole Gunnar Solskjær um upphitun.

18 krakkar kepptu í knattþrautunum og Arnór sigraði og fær verðlaun í hálfleik á leik Manchester United og Blackburn sem fer fram klukkan 17:15 í dag.

Arnór er reyndar stuðningsmaður Chelsea en systir hans segir að það muni örugglega eitthvað breytast eftir þetta ævintýri.