Umfjöllun: Þrumufleygar Blika sökktu Stjörnunni

Breiðablik vann Stjörnuna 2-1 í lokaleik áttundu umferðar Pepsi-deildar karla á Kópavogsvelli í kvöld. Leikurinn var flott skemmtun og mörk Blika ákaflega glæsileg.

Það voru þó gestirnir úr Garðabæ sem byrjuðu betur. Sóttu nokkuð stíft að marki Blika en þó án þess að skapa sér verulega góð færi enda varnarleikur Blika þéttur. Ingvar Kale virkaði þó eitthvað taugaóstyrkur í markinu.

Blikarnir náðu um síðir tökum á miðjunni og um leið leiknum. Þeir fengu bestu færi hálfleiksins en tókst ekki að skora. Fyrst skallaði Kári Ársælsson yfir úr dauðafæri og svo skaut Arnar Grétarsson beint á Bjarna Þórð markvörð í upplögðu færi.

Arnar var framarlega á miðjunni í kvöld með tvo vinnuþjarka fyrir aftan sig. Það skilaði sínu því sóknarleikur Blika var mun markvissari í kvöld en upp á síðkastið.

Það var markalaust í leikhléi en Finnur Orri Margeirsson færði Stjörnunni mark á silfurfati í upphafi seinni hálfleiks. Hann hitti þá ekki boltann eftir útspark, Arnar Már komst í gegn og kláraði vel.

Blikar spýttu enn frekar í lófana við markið og Alfreð Finnbogason jafnaði metin með stórkostlegu marki. Stjarnan náði ekki að hreinsa, Alfreð fékk boltann fyrir utan teig og klíndi honum í nærskeytin.

Tíu mínútum síðar skoraði Kristinn Steindórsson einnig með glæsilega langskoti. Aftur gekk Stjörnunni illa að hreinsa, Kristinn sá markvörðinn standa of framarlega og lyfti honum listavel yfir hann og í markið.

Stjörnumenn áttu fínan endasprett en gekk illa að skapa sér færi. Steinþór var þó ekki fjarri því að jafna í uppbótartíma en skot hans fór í slána.

Blikar fögnuðu gríðarlega góðum sigri sem þeir áttu skilið. Miðjan var þeirra lengstum, þeir sköpuðu betri færi en nýttu síðan langskotin. Varnarleikurinn var síðan þéttur.

Stjörnumenn þurfa ekkert að örvænta þrátt fyrir tapið. Þeir spiluðu ágætlega á köflum en gáfu of mikið eftir í kjölfar þess að þeir komust yfir. Miðjan var þó ekki nóg öflug og það vantaði fleiri svör þegar Blikum tókst að klippa Steinþór út úr spilinu.

Breiðablik-Stjarnan 2-1

0-1 Arnar Már Björgvinsson (49.)

1-1 Alfreð Finnbogason (59.)

2-1 Kristinn Steindórsson (69.)

Áhorfendur: 1.347

Dómari: Jóhannes Valgeirsson 3.

Skot (á mark): 12-15 (6-5)

Varin skot: Ingvar 4 – Bjarni 3

Horn: 9-5

Aukaspyrnur fengnar: 13-12

Rangstöður: 5-2

Breiðablik (4-2-3-1)

Ingvar Þór Kale  5

Arnór Sveinn Aðalsteinsson  5

Guðmann Þórisson  6

Kári Ársælsson  6

Kristinn Jónsson  6

Finnur Orri Margeirsson  4

Guðmundur Kristjánsson  7

Olgeir Sigurgeirsson   5

Arnar Grétarsson  7

Kristinn Steindórsson  6

(89., Haukur Baldvinsson  -)

Alfreð Finnbogason  7 - Maður leiksins.

Stjarnan (4-3-3)

Bjarni Þórður Halldórsson  4

Guðni Rúnar Helgason  6

Daníel Laxdal  7

Tryggvi Bjarnason  6

Hafsteinn Rúnar Helgason  5

Björn Pálsson  4

Birgir Hrafn Birgisson  3

(90., Bjarki Páll Eysteinsson  -)

Steinþór Freyr Þorsteinsson  6

Arnar Már Björgvinsson  6

(76., Magnús Björgvinsson  -)

Halldór Orri Björnsson  4

Ellert Hreinsson  2

Boltavakt Vísis og Fréttablaðsins var með beina lýsingu frá leik Breiðabliks og Stjörnunnar í 8. umferð Pepsi-deildar karla.

Smelltu hér til að opna Boltavaktina og lesa lýsingu leiksins: Breiðablik - Stjarnan.

Þá er einnig hægt að nálgast Boltavaktina í Vodafone Live! farsímaþjónustunni.