Arnar Grétarsson: Herbalife heldur mér gangandi

„Ég er alveg búinn á því. Ég er kominn með krampa í nárann, í hælinn og ég veit ekki hvað og hvað," sagði gamla brýnið Arnar Grétarsson eftir sigur Blika á Stjörnunni.

Arnar átti flottan leik fremst á miðjunni en heldur dró af honum undir lokin og hann fór ekkert í felur með það að vera bensínlaus eftir leik.

„Þetta var orðið helvíti erfitt í restina. Ég kunni vel við þessa nýja stöðu en ég lék þessa stöðu lengi þegar ég var í atvinnumennskunni. Ég er því vanur að vera þetta framarlega," sagði Arnar sem átti ekki mikið eftir af bensíni þegar hann fékk stungusendingu undir lokin.

„Ég var búinn að segja við strákana að það væri allt í lagi að senda stungur á Hauk og þessa stráka en ég kýs að fá boltann í fæturna. Þessar stungusendingar eru ekkert fyrir mig," sagði Arnar og brosti en hann var að fá sér orkudrykk eftir leikinn.

„Þetta er Herbalife, maður. Þetta heldur mér gangandi. Svo er það ísbaðið eftir drykkinn og svo kemur í ljós hvort ég get gengið á morgun," sagði Arnar léttur og lét sig hverfa inn í klefa þar sem ísbaðið beið eftir honum.