Shevchenko vill vera áfram hjá Chelsea

Andriy Shevchenko segir að hann verði áfram í herbúðum Chelsea á komandi tímabili í ensku úrvalsdeildinni.

Shevchenko var lánaður til AC Milan á síðustu leiktíð en þar fékk hann afar lítið að spila. Carlo Ancelotti þjálfaði Shevchenko til margra ára hjá Milan en hann er nú stjóri Chelsea.

Hann hefur verið sagður á leið frá Chelsea nú í sumar en nú segist hann ætla að vera áfram.

„Ég á enn ár eftir af samningi mínum við Chelsea og ég vil vera í London þar til hann rennur út," sagði hann í samtali við enska fjölmiðla.