Sunderland sýnir Turner áhuga - Mensah væntanlegur

Knattspyrnustjórinn Steve Bruce hjá Sunderland hefur staðfest að félagið hafi spurst fyrir um möguleikann á að kaupa varnarmanninn Michael Turner frá Hull.

Talið er að Sunderland sé tilbúið að leggja fram 6 milljón punda kauptilboð í leikmanninn sem var undir smásjá Rafa Benitez hjá Liverpool fyrr í sumar.

„Það er erfitt að tjá sig um leikmenn þegar ekki er búið að ganga frá einu né neinu en það er rétt að við höfum spurst fyrir um Turner," segir Bruce í samtali við Sky Sports fréttastofuna og staðfesti jafnframt að stutt sé í að John Mensah fái leikheimild til þess að spila með Sunderland.

Mensah kemur til Sunderland á lánssamningi frá Lyon.