Enn beðið eftir leikheimild fyrir Emil

Emil Hallfreðsson hefur ekki enn fengið leikheimild með Barnsley sem leikur í ensku B-deildinni vegna seinagangs hjá ítalska knattspyrnusambandinu.

Emil er samningsbundinn Reggina á Ítalíu en verður í láni hjá Barnsley á þessari leiktíð.

Simon Davey, stjóri Barnsley, greindi frá því í dag að hann hefði gjarnan viljað nota Emil í leik liðsins gegn Preston á þriðjudagskvöldið.

„Í hreinskilni sagt skil ég ekki hvað er í gangi," sagði hann í samtali við enska fjölmiðla. „Við höfum verið í símasambandi við enska knattspyrnusambandið og reynt að koma okkur í samband við það ítalska en mönnum liggur greinilega ekki á að ýta þessu máli í gegn."

„Ég held að knattspyrnusambönd landanna eru að taka sinn tíma til að ganga frá sínum málum og það hefur verið að gera okkur lífið leitt."

Barnsley tapaði fyrir Preston á þriðjudaginn, 3-0, og er í neðsta sæti ensku b-deildarinnar með eitt stig eftir þrjá leiki.