Forseti Bordeaux segir Chamakh ekki á förum í janúar

Framherjinn Marouane Chamakh hjá Frakklandsmeisturum Bordeaux var afar eftirsóttur í sumar og félög á borð við Arsenal og West Ham sögð áhugasöm um að fá hann í sínar raðir.

Núgildandi samningur Chamakh rennur út næsta sumar og því var búist við því að Lundúnafélögin myndu gera aðra tilraun til þess að fá hann til sín á tombóluverði þegar félagaskiptaglugginn opnar að nýju í janúar.

Forsetinn Jean-Louis Triaud hefur hins vegar tekið fyrir það og útilokar að leikmaðurinn verði seldur í janúar.

„Það kemur ekki til greina að selja Chamakh í janúar. Hann er mikilvægur leikmaður og lyftir öllum hjá Bordeaux upp á hærra plan," er haft eftir Triaud í frönskum fjölmiðlum í dag.