Nýtt skattkerfi jafnar byrðum

Einstaklingar með tekjur undir 270 þúsund á mánuði og hjón undir 540 þúsundum munu greiða lægri tekjuskatt á næsta ári samkvæmt þriggja þrepa skattkerfi sem tekið verður upp á næsta ári. Hámarks heildarskattheimta verður 40 prósent.

Tillögur ríkisstjórnarinnar í skattamálum voru samþykktar á aukafundum þingflokka stjórnarflokkanna í morgun. Helsta breytingin er að tekið verður upp þriggja þrepa skattkerfi þar sem einstaklingar með unir 200 þúsundum í mánaðarlaun greiða 24,1 prósent í tekjuskatt, þeir sem eru með tekjur á bilinu 200 til 650 þúsund á mánuði greiða 27 prósent á tekjur umfram 200 þúsund og þeir sem eru með 650 þúsund eða meira í mánaðarlaun greiða 33 prósent á það sem er umfram 650 þúsundin.

Þá hækka skattleysismörk úr 113 þúsund krónum í 119 þúsund. Að samanlögðu segja formenn stjórnarflokkanna að þetta þýði að einstaklingur með undir 270 þúsundum og hjón með mánaðarlaun undir 540 þúsundum muni greiða minna í tekjuskatt á næsta ári en þau gera nú. Aukin skattbyrði færist því á þá hópa sem eru með hærri laun en þetta og þá mest á þá sem eru með laun yfir 650 þúsund krónur. Hámarks heildarskattheimta verður 40 prósent.

Samkvæmt tölum frá Fjármálaráðuneytinu hafa breytingarnar þau áhrif að einstaklingur með 180 þúsund krónur í laun greiðir tvö þúsund krónum minna í skatt af launum sínum. Hjón með 350 þúsund krónur í laun greiða 4.700 krónur meira í skatt og hjón með 700 þúsund krónur í laun greiðir 31.000 krónum meira í skatt af launum en áður.

Þá verður fjármagnstekjuskattur hækkaður úr 15 prósentum í 18 prósent, en fyrstu 100 þúsund krónurnar í vaxtatekjum verða þó skattfrjáls.

Nýtt 14 prósenta skattþrep verður sett á í virðisaukaskatti og sumt sem nú ber 7% virðisauka hækkað í 14 prósent, aðallega sykurvörur ýmis konar. Nýja þrepið tekur gildi í mars á næsta ári en um áramót hækkar efsta þrep virðisaukaskattsins úr 24,5 prósentum í 25 prósent. Samanlagt eiga breytingar á virðisaukaskattskerfinu að skila um 8 milljörðum í ríkissjóð.

Orku- , umhverfis og auðlindaskattar eiga að skila 5,6 milljörðum. Þar munar mest um 12 aura gjald sem lagt verður á hverja selda kílóvattsstund af rafmagni sem skili 1,8 milljörðum, þar af 1,6 milljörðum frá stóriðjunni.

Aðrir tekjustofnar eru all nokkrir, þannig á 1,6 prósentustiga hækkun tryggingagjalds að skila 12 milljörðum í auknar tekjur sem duga á til að standa undir auknum kostnaði af atvinnuleysisbótum. Þá á kolefnisgjald að skila 2,5 milljörðum en það leggst á allt eldsneyti. Samanlagt eiga nýir skattar og gjöld að skila um 50 miljörðum á næsta ári.