Babel sagður vera frábær rappari

Hollenski vængmaðurinn hjá Liverpool, Ryan Babel, mun sýna á sér nýjar hliðar á næstunni þegar nýjasta plata breska rapparans Sway kemur í plötubúðir.

Babel rappar nefnilega með Sway í einu laginu en þetta mun vera frumraun hans á þessu sviði.

„Það er mikið til í þessum orðrómi. Ég ætlaði að halda þessu leyndu aðeins lengur en það hefur greinilega einhver komist á Twitter-síðuna mína," sagði Sway sem er ánægður með frammistöðu knattspyrnumannsins.

„Við Ryan erum góðir vinir og hann er fínn strákur. Hann er líka gjörsamlega geðveikur rappari. Flæðið hjá honum er rosalegt og þess vegna var aldrei spurning um að leyfa honum að vera með. Hann rúllaði þessu upp strákurinn og ég held að fólk eigi eftir að falla fyrir þessu lagi," sagði Sway sem er augljóslega ekkert að nota Babel til að auglýsa plötuna sína.